رحم علي جعفري: رحم علي جعفري 12 جولاءِ 1912ع تي لاڙڪاڻي شهر ۾ پيدا ٿيو. پرائمري تعليم لاڙڪاڻي پي. وي اسڪول مان ۽ انگريزي تعليم سنڌ مدرسي اسڪول لاڙڪاڻي مان حاصل ڪيائين. هن استادن جي ٽريننگ هڪ هڪ سال جي وقفي کانپوءِ 1942ع، 1944ع ۽ 1946ع ۾ حيدرآباد مان مڪمل ڪئي. اها تعليم ان وقت بي. اي جي ڊگري برابر هوندي هئي. رحم علي جعفريءَ جو ذريعه معاش استادي پيشو رهيو. 1941ع ۾ قديم پي. وي اسڪول لاڙڪاڻي ۾ استاد مقرر ٿيو. ن کانپوءِ هن سال 1949ع کان 1959ع تائين گورنمينٽ پائلٽ هاءِ اسڪول ۾ پڙهايو، جتي پهرين اسسٽنٽ ماستر ۽ پوءِ اسڪائوٽ ماستر ٿيو. 1959ع ۾ سندس ٽيچرس ٽريننگ اسڪول سکر ۾ بدلي ٿي، جتي 1961ع تائين رهيو، جتان پوءِ ٽيچرس ٽريننگ اسڪول لاڙڪاڻي ۾ بدلي ٿي آيو. هن 1971ع ۾ رٽائرمينٽ ورتي. اسڪائوٽنگ لاءِ بيحد داد لائق ڪوششون ڪيائين. سندس فعال قيادت ۽ وڏي تجربي لاڙڪاڻي جي نوجوان نسل ۾ خدمت خلق جو جذبو پيدا ڪيو. سڄي زندگي اسڪائوٽنگ سان واڳيل رهيو. هن اسڪائوٽنگ جي شروعات 1928ع ۾ ڪئي، جڏهن پاڻ مدرسي هاءِ اسڪول لاڙڪاڻي جو شاگرد هو. 1936ع ۾ لاڙڪاڻي ۾ اسڪائوٽ جي سکيا ڪيمپ لڳي، جنهن ۾ هن به ٽريننگ حاصل ڪئي. هن مسلسل اسڪائوٽنگ ۾ ڪاميابيون ماڻڻ لاءِ وڏي محنت ڪئي ۽ سندس ڪارڪردگي قابل فخر رهي. 1944ع ۾ هند جي وائسراءِ ويول کيس سرٽيفڪيٽ آف ميرٽ ڏنو. 1942ع کان 1946ع تائين حيدرآباد ۾ اسڪائوٽ سکيا ڪئمپن ۾ مسٽر لعلواڻيءَ کانپوءِ ٻئي نمبر تي هو. 1960ع ۾ پاڪ حيدري اسڪائوٽ اوپن گروپ قائم ٿيو ته رحم علي جعفريءَ لاڙڪاڻي ۾ قائم ٿيندڙ شاخ جو پهريون صدر مقرر ٿيو. هي تنظيم سان ساٿ نڀائيندي عمر جي آخري گھڙي تائين وابسته رهيو. هن 17 فيبروي 1988ع تي 76 سالن جي ڄمار ۾ وفات ڪئي.
1912.07.12 عيسوي
رحم علي جعفري 12 جولاءِ 1912ع تي لاڙڪاڻي شهر ۾ پيدا ٿيو.
1988.02.17 عيسوي
رحم علي جعفري 17 فيبروي 1988ع تي 76 سالن جي ڄمار ۾ وفات ڪئي.